بناءاً على طلبات الجماهير قررنا نحن"دومة" إعادة نشر القصيدة الناريـــة في "سب" الحقبة المباركية

-تصفيق حاد- …شكراً ،شكراً..دعونا نعمل في صمت

المهم …إن الناس اللي طلبوا القصيده دي غالباً متضايقيين مني وعاوزيني أروح زياره لطرة …

عامـــــة ….القصيدة أهي

يللا يا ابن مبارك امشي
بكفايانا غباء جنابك
انت فاكر مصر عزيه
هي من ابوك اللي نابك
لأه يا اهبل مصر حرة
منها راح تاخد حسابك
*******************
مش هنكسر زير وراك
أصل زيرنا خساره فيك
زيرنا نشفته بغباوتك
زيرنا نجسته بعنيك
مصر حره غصب عنك
مهما هتعدل إيديك
*******************
مصر حره غصب عنك
والشعوب دي راح تبيدك
والمعارض راح يشيلك
مالقصور وهيبقى سيدك
وانت بعد العز دوت
عالرصيف هتمد إيدك
*****************
يللا يا ابن مبارك امشي
إحنا خدنا منك إيه؟؟
غير غلاء وكمان بلاوي
والحرامي بيبقى بيه
أما لو واحد يصلي
في السجون تطلع عنيه
****************
يللا يا ابن مبارك امشي
يللا وكفاياك كلاحه
إحنا والله زهقنا منك
جيلنا بيقولها بصراحه
لسه ناوي تورث ابنك
ده انت والله بجح بجاحه!!
**********************
يللا يا ابن مبارك امشي
لسه ما كفاك ذنوب
يللا غور بكفايا غلبك
مالكراسي يللا توب
هو قلبك ده انت شايله
مبدله بحديد وطــــوب؟؟
******************
يللا يا ابن مبارك امشي
آخرتك دي أكيد جحيم
هو جيبك مش بيشبع
يا آخي اعمل له ريجيم
ده احنا فاضل يوم ونشحت
وانت بتبدل حريـــــــم؟
****************
يللا يا ابن مبارك امشي
وابقى خد وياك جمال
هي ناقصه بلاوي تانية
بتجيبوا لنا كمان عيال
إنت بتقلد صحابك؟؟
ليــه ما لبستوش عقال ؟
*****************
يللا يا ابن مبارك امشي
شعري قرفان ينطق اسمك
امشي غور كفاياك نداله
دي الخيانه هي رسمك
جاي تقول صهيون ده جارنا
انت فاكر غزه قسمك؟؟
*********************
امشي يللا ولم نفسك
اسمك انت عليك خساره
عمري يوم ما سمعت انك
قلت شيء فيه الجساره
ربنا يريحنا منك
تمشي راكـــب فوق حماره

…و…

ود