ملعون أبوه .. من تدوينات سجين
كتبهاأحمد دومة ، في 26 مارس 2009 الساعة: 16:06 م
من تدوينات سجين
ملعون أبوه …
يا كل عاشق للوطن
حان المعاد
إرسم على وشوش السما
" رغم المحن .. حرة البلاد "
زلزل بصوتك عرشهم
وامحى بكرامتك إسمهم
وارفض نكون للقوادين .. والعاهرين
احنا الولاد
إضرِب .. وإضرب صرحهم
وابقى انت شوكة فــ حلقهم
ده القهر زاد .. والعهر زاد .. والظلم زاد
وبلادنا بعد المجد صارت .. بين ايديهم
أرض بايرة .. زرعها .. ذل وسكوت
والطرح إيه .. غير الفساد ؟!
ياكل عاشق للوطن .. حان المعاد
من ربع قرن
وهو نفس الدور .. لكل الموجودين
هما البطل .. والمسرحية عالوطن
وإحنا يادوب متفرجين
هما اللى هتكوا العرض
وإحنا رضينا نبقى حارس ندل
.. لشوية كلاب
فضوا غشاءك يا وطن
وإحنا دفنا روسنا فى الطين والتراب
يبقى بلدنا مستباح
واحنا وسكوتنا للعدا .. نصر ومعين !
يبقى الذئاب هما الحكم
والخصم ديب من نسلهم
واحنا الرعاة
بعنا الغنم ببلاش .. عشان نرضى الطغاة
وياريت قبضنا فــ يوم تمن
ده إحنا اتسرقنا
وخفنا حتى ال ( لأة ) تخرج مــ الشفاه
ولبسنا توب الذل
فاكرين هيستر صمتنا
وأتارينا بيه مــ العريانين
ياللى رضيتوا بالهوان
حان المعاد
دم الآلاف بيبص فــعنينا بوجع
وبيسأل القاعدين هنا
مين الجبان .. ومين جدع ؟!
مين ياخد التار للولد ؟!
من ياخد الذل اللى فــ قلوبنا
.. من زمان جدره إنزرع
يحرق جدوره بألف ( لأ ) .
يشربه كاس الهلع
ويقول ده تار المظلومين
.. من ربع قرن من الزمن
والسرقة من نفس الوشوش
ما اتغيروش
دى كلب غبية ..
بتنهش الوطن البرئ
.. حبة وحوش
دور الدفاع ده كان علينا من زمان
بس احنا سبنا السيف
.. وقلنا مين يحوش
ناسيين بإن لكل حاجة فـ الوجود
وقت ومعاد
وأهو جه المعاد
ياكل عاشق للوطن .. حان المعاد
جهز لصمت سنين طويلة 100 تابوت
الحق مش ممكن يموت
ارفض وجودهم وسطنا
.. وبأعلى صوت
إلعن أبوه اللى حاكمنا
من هناك
من جوة قصر
قوم ياابن مصر
إكسر تماثيله بإديك
لاجل بعد العسر ييجى ألف يسر
ياكل عاشق للوطن ..
حان المعاد
وهاييجى بعد العسر يسر
أحمد دومة
سجن دمنهور العمومى
22 – 2- 2009
ـــــــــــــــــــــــــــــــــــــــــــــــــــــــــ
التصنيفات : غير مصنف | دوّن الإدراج
